دوای هه‌فته‌یه‌ك له خنكانی ته‌رمی ئه‌یهانی ته‌مه‌ن پێنج ساڵان دۆزرایه‌وه
دوای نزیکەی هەفتەیەک لە خنکانی، لەلایەن تیمەکانی بەرگری شارستانییەوە توانرا تەرمی ئەیهانی تەمەن پێنج ساڵان بدۆزرێتەوە.
بەڕێوەبەرایەتی بەرگری شارستانی سۆران بڵاویکردەوە: "کەمێک پێش ئێستا تەرمی ئەیهانی تەمەن پێنج ساڵان لە رووباری رواندز لەنێوان گوندی وارەکەون و بەرزێوە دۆزرایەوە".
رۆژی هەینی، باوک و کوڕێک بە ناوەکانی سۆران مەلا نەبی و ئەیهان بە مەبەستی گەشت و سەیران روویان لە ناحیەی گەڵاڵە کردبوو، لەکاتی مەلەکردندا هەردوو ناوبراو خنکان.
دوای رووداوەکە توانرا تەرمی سۆران بدۆزرێتەوە، بەڵام دۆزینەوەی تەرمی ئەیهان شەش رۆژی خایاند و بەرگری شارستانی سۆرانیش هۆکاری درەنگ دۆزینەوەی منداڵەکەی بۆ خێرایی و ساردی ئاوەکە گەڕاندەوە.
