image


پەیامی کورد … پێشبینی یەكەم شەپۆڵە بارانی پایز كرا

شارەزایەكی بواری كەشناسی رایگەیاند، پێشبینی دەكرێت لە رۆژانی (14 – 18) ی ئەم مانگە یەكەم شەپۆڵی بارانبارینی پایزی ئەمساڵ دەستپێبكات.

(ئاراس جەبار) شارەزای بواری كەشناسی رایگەیاند، بەپێی دواین نوێبوونەوەكانی مۆدێلی GFS ئەمریكی یەكەم شەپۆڵی بارانبارین لە پایزی ئەمساڵدا لە رۆژانی (14 – 18) ی ئەم مانگە دەستپێدەكات، لە شەپۆڵێكی لاواز پێكدێت لە ناوچە شاخاوییەكانیش كاریگەری مامناوەند دەبێت.

راشیگەیاند، لە نەخشەكانی دیكەی كەشوهەوادا، تا ئێستا ئەم ئەگەرە دەرنەكەوتووەو لە ئارادا نیە، بۆیە بەووردی چاودێری دۆخەكە دەكەین لەئەگەری جێگیربوون و پشتراستكردنەوەی پێشبینیەكە لە زۆرینەی نەخشەكاندا زانیاری زیاترمان لە رۆژانی ئایندەدا دەبێت.

پێشتریش نائیل عەلی شارەزای كەشناسی عێراقی ڕایگەیاندبوو، تاكو (10) رۆژی داهاتوو هیچ پێشبینییەك نییە بۆ باران بارین لە سەرتاسەری وڵاتدا، بەڵام لە ناوەڕاستی ئەم مانگەدا لە هەندێ ناوچە باران بارینی وەرزی پایز دەستپێدەكات.

ئەو هەرچەندە ئاماژەی بە ناجێگیری پێشبینیەكانی كەشوهەوا كردووە، بەڵام دەشڵێت: رەنگە لە مانگی تشرینی یەكەم و دووەم لەهەندێ ناوچە بارانێكی كەم ببارێت.