image


پەیامی کورد … زیندانی غوێران كۆنترۆڵ كرا

قەسەدە ڕایگەیاند، شەڕڤانان و هێزەكانی ئاسایشی ناوخۆ تەواوی زیندانی غوێرانی حەسەكەیان كۆنترۆڵكردووەو سەرجەم چەكدارەكانیش خۆیان ڕادەستی شەڕڤانان كردۆتەوە.

ناوەندی ڕاگەیاندنی قەسەدە لە بەیاننامەیەكدا ڕایگەیاند، شەڕڤانان و هێزەكانی ئاسایشی ناوخۆ بەتەواوی زیندانی غوێرانیان لە حەسەكە كۆنترۆڵكردووە.

قەسەدە ئەوەشی خستۆتەڕوو، كە سەرجەم ئەو چەكدارانەی لەناو زیندانەكەوە هەڵهاتبوون و ڕووبەڕووی هێزەكان دەبوونەوە، خۆیان ڕادەستی شەڕڤانان كردۆتەوە.

شەوی پێنج شەممەی ڕابردوو شانە نووستووەكانی داعش هێرشیانكردە سەر زیندانی غوێرانی حەسەكە، كە نزیكەی پێنج هەزار چەكداری داعشی تێدا زیندانییكراوەو بارهەڵگرێكی بۆمبڕێژكراویان لە بەردەم یەكێك لە دەرگاكانی زیندانەكەدا تەقاندەوەو ڕووبەڕووی پاسەوانانی زیندانەكە بوونەوە، بەوهۆیەوە ژمارەیەك لە چەكدارە زیندانییكراوەكانی داعش لە زیندانەكە چوونە دەرەوەو شەڕو پێكدادانی لێكەوتەوە.

لەماوەی شەش ڕۆژی ڕابردوودا ڕووبەڕووبوونەوە لەنێوان چەكدارە هەڵهاتووەكانی داعش و شەڕڤانانی قەسەدەو هێزەكانی ئاسایشی ناوخۆ بەردەوامبوو، شەڕڤانان ڕێگرییان كرد لە هەڵهاتنی چەتەكان و دەوروبەری گرتووخانەی غوێرانیان گەمارۆدا.

ڕۆژی (23/1) یش ناوەندی ڕاگەیاندنی قەسەدە ڕایگەیاند، كە لە ڕووبەڕووبوونەوەكانی زیندانی ‌غوێراندا (175) چەتەی داعش كوژراون و (27) شەڕڤانیش شەهیدبوون.