"گەورەترین کێشەی نێوان هەرێم و بەغدا دۆسیەی نەوتە"

"گەورەترین کێشەی نێوان هەرێم و بەغدا دۆسیەی نەوتە"

بەوتەی وەزیری کۆچ و کۆچبەرانی عێراق، دۆسیەی نەوت گەورەترین کێشەی نێوان هەرێمی کوردستان و حکومەتی عێراقە و کێشەکانیش زۆر ئاڵۆزن.
لە کۆنگرەیەکی ڕۆژنامەوانیدا دەرباز محەمەد وەزیری کۆچ و کۆچبەرانی عێراق رایگەیاند، کە کێشەی سیاسی نێوان هەولێر و بەغدا پەلیهاویشتووە بۆ کێشەی ئابوری و بودجە و مووچە، هێشتا لە نێوان هەرێم و عێراقدا ئەو دانوستانە گەرموگوڕە نییە بۆ چارەسەری کێشەکانی نێوانیان، هۆکاری سەرەکیش ئەوەیە کێشەکان زۆر زۆر قورس و ئاڵۆزن.
وتیشی، "گەورەترین کێشەی نێوان هەرێم و بەغدا دۆسیەی نەوتە کە زۆر ئاڵۆزە، پێناچێت لە ماوەیەکی نزیکدا یان لەمساڵدا بگەنە چارەسەر، بەڵام هیوا هەیە لەماوەی ئەمساڵدا و دوای هەڵبژاردن بگەین بە ئاشتەواییەکی تەواو لەسەر گرفتەکان.
ئاماژەی بەوەشکرد، کە لەئێستادا لیژنەی تایبەت هەیە لەسەر بابەتی خاڵە سنوریی و فڕۆکەخانەکان و بەرەو پێشچوونی زۆر باش هەیە، بەڵام لەسەر پرسی مووچە گرفتی وردبینی ناوەکانی پەروەردە و تەندروستی هێشتا نەگەیشتووەتە خاڵی کۆتایی".