image


پەیامی کورد … تابلۆی ئۆتۆمبێل لە هەرێمی کوردستان و عێراق یەكدەخرێت

بەڕێوەبەرایەتی گشتیی هاتووچۆی عێراق ڕایدەگەیەنێت، لە هەوڵدان بۆ گرێبەستكردن لەگەڵ كۆمپانیایەكی جیهانی بۆ جێبەجێكردنی پرۆژەی یەكخستنی تابلۆی ئۆتۆمبێل بە زمانی ئینگلیزی و بە هەماهەنگی لەگەڵ هەرێمی كوردستان.

لەمبارەیەوە تارق ئیسماعیل، بەڕێوەبەری گشتیی هاتوچۆ سەر بە وەزارەتی ناوخۆی عێراق بەڕۆژنامەی سەباح-ی راگەیاندووە: پشت بە بەرنامەی كار بە هەماهەنگی لەگەڵ هەرێمی كوردستان دەبەسترێت كە بریتییە لە یەكخستنی تابلۆی ئۆتۆمبێل و نوسینی بە ئینگلیزی وەك ئەوەی لە زۆرینەی وڵاتاندا هەیە.

ناوبراو وتویەتیشی: “تابلۆكان بە قەبارەی تابلۆكانی پێشوو و هەمان ڕەنگ دەبن، سپی بۆ تایبەت، سوور بۆ كرێ، شین بۆ حكومی و سەوز بۆ سوپا، سەرەڕای ئەوەی كۆدێكی دیاریكراوی دەبێت بۆ هەر پارێزگایەك لەجیاتی ناوەكەی”.

ئاماژەی بەوەكردوە كە وەزارەتی ناوخۆ لە ئامادەكاریدایە بۆ گرێبەستكردن لەگەڵ كۆمپانیایەتی تایبەت بە تابلۆ بۆ كردنەوەی لقێكی خۆی لە بەغداد، بەمەبەستی زامنكردنی خێرایی بەڕێوەچوونی كارەكە و پێدانی لە وادەیەكی دیاریكراودا بە خاوەن ئۆتۆمبێل.

لای خۆشیەوە فازڵ حاجی، وتەبێژی ھاتوچۆی ھەولێر پێشتر ڕاگەیاندبوو، پێشتر چەندین جار ڕێککەوتن لەنێوان ھەردوو وەزارەتی ناوخۆی ھەرێم و فیدراڵ بۆ یەکگرتنی تابلۆی ئۆتۆمبێل کراوە، بەڵام ھێشتا نەچووەتە بواری جێبەجێکردن ئێستا بڕیارە جارێکی دیکە دەست بە جێبەجێکردنی پلانەکە بکرێت، ئەویش یەک شێوازی تابلۆی ئۆتۆمبێل لە ھەموو عێراق پەیڕەو بکرێت.

ئەوەشی وتوە: “تابلۆی سیستەمی نوێ، ئەوەی کۆمپانیا ئەڵمانییەکە، قەبارەیەکی بچووکی ھەیە و ھەرێمی کوردستان تەنیا قەبارەکەی بچووک دەکاتەوە و لەگەڵ عێراق دەبێتە یەک”.