image

پەیامی کورد     ...   کونسوڵخانەى کۆوەیت لە هەرێمی کوردستان هاوکاری دەرمانی و خۆراکی پێشکەشی وەزارەتی تەندرووستی و هاووڵاتییان دەکات

کونسوڵخانەى کۆوەیت لە هەرێمی کوردستان، لەڕێگەى دەزگاى خێرخوازى بارزانى و وەزارەتى تەندروستییەوە ١٠ تەن دەرمان و حەوت هەزار و ١٠٠ سەبەتەی خۆراکی پێشکەش بە وەزارەتی تەندرووستی و هاووڵاتییان کرد.

ئەمڕۆ د. سامان بەرزنجى وەزیرى تەندرووستی حکوومەتی هەرێمى کوردستان لە پرێس کۆنفرانسێکدا ووتى: "ئەو ئامێر و کەرەستە تەندرووستییانەى کە بریتین لە پێداویستییەکانى هۆڵى نەشتەرگەرى و چاودێریی چڕ، گرینگی خۆی هەیە، بەتایبەتى ئێستا کە تووشبوانێکى زۆرى ڤایرۆسی کۆرۆنا لە هۆڵەکانى چاودێریی چڕ لەژێر ئامێرەکانى هەناسەدانى دەستکرددان، بۆیە پێشکەشکردنى ئەم ئامێرانە هاوکار دەبێت بۆ سەلامەتی گیانى هاووڵاتییانى کوردستان".

هەر لەمبارەوە مووسا ئەحمەد، سەرۆکى دەزگاى خێرخوازی بارزانى، بە ڕۆژنامەنووسانى ڕاگەیاند: "کە ١٠ تەن دەرمان و حەوت هەزار و١٠٠ سەبەتەى خۆراک لەلایەن کونسووڵخانەى کوێتەوە پێشکەش بە هەرێمى کوردستان کراون و بەسەر وەزارەتی تەندرووستی هاووڵاتیانى کوردستاندا دابەش دەکرێن".

ڕوونیشى کردەوە بەهای هەموو ئەو کەرەستانە بە زیاتر لە یەک ملیۆن دۆلار دەخەمڵێنرێن و دیاری دەوڵەتى کوێتە بۆ خەڵکى کوردستان.

لەبارەى ئەو هاوکارییانەوە ئومێد خۆشناو پارێزگارى هەولێڕ ئاماژەى بۆ ئەوە کرد: "کونسووڵخانەى کۆوەیت هاوکاری بەردەوام پێشکەش بە خەڵکى کوردستان کردووە و ئەمڕۆش بەو دوو هاوکارییە تەندرووستى و خۆراکییانە، کە زیاتر لە ملیۆنێک دۆلار زیاتر گوژمەکەیەتى، ئەو هاوکارییانە کە بۆ خەڵکى کوردستانە، بەسەر دانیشتوانی ئەو شوێنانەدا دابەش دەکرێت کە زیانیان لێ کەوتووە".

عومەر کەندەرى، کونسووڵى کۆوەیت یش لە هەرێمی کوردستان ئاماژەى بۆ ئەوە کرد: "ئەوەى تاکوو ئێستا کراوە، بریتی بووە لە ئەرکى مرۆیی و دراوسێیانە و هەرێمى کوردستان شایستەى ئەو هاوکارییانەیە، بۆیە ئەو هاوکارییە مرۆییانە هەم بۆ خەڵکى کوردستان هەم بۆ ئەو ئاوارە و پەنابەرانەى کە لە کوردستان حەوێنراونەتەوە و هاوکارییەکانیش بەردەوام دەبن".