image

پەیامی کورد      ...    پێنجەمین كۆڕبەندی وەبەرهێنانی بازرگانی و كشتوكاڵی عێراق - توركیا لە شاری ئیزمیر لە توركیا بەڕێوە دەچێت

بڕیارە پێنجەمین كۆڕبەندی وەبەرهێنانی بازرگانی و كشتوكاڵی عێراق - توركیا لە شاری ئیزمیر لە توركیا بەڕێوە بچێت و، سەرجەم ژوورە بازرگانییەكانی عێراق و هەرێمی كوردستانیش بەشدار دەبن.

دارا جەلیل خەیات، سەرۆكی ژووری بازرگانی هەولێر، ڕایگەیاند: "كۆربەندی هاوبەشی ژوورە بازرگانییەكانی هەرێمی كوردستان و توركیا ساڵانە لە ئیزمیر بەڕێوە دەچێت و بۆ ماوەی چوار ڕۆژ بەردەوام دەبێت، كۆڕبەندەكەش بۆ قسەكردن و برەودانە بە پەیوەندییە بازرگانییەكان و بەرەوپێشبردنی قەبارەی ئەو جمووجوڵە بازرگانییەیە كە ئێستا لە نێوان كوردستان و توركیادا هەیە، لە نزیكەوە لەگەڵ ژوورە بازرگانییەكانی ووڵاتی توركیا و بازرگانان و خاوەنكارانی ئەو ووڵاتە كۆدەبینەوە، بۆ ئەوەی بە كارەكانی یەكتری ئاشنا بین و  پلانی داهاتووی خۆمان وەك ژوورە بازرگانییەكانی كوردستان بۆ سەرمایەداران و بازرگانانی توركیا بخەینە ڕوو، بە بە پێچەوانەشەوە".

ناوبراو روونیشی كردەوە: "بەدەر لەوە، هەر لە كۆڕبەندەكەدا بە دیاریكراوی ژمارەیەك كۆنفڕانس بەڕێوە دەچن، كە تێیدا لەلایەن شارەزایانی ئابوورییەوە بەرچاوڕوونی پێویست دەدرێت بە بازرگانان لە مامەڵە بازرگانییەكاندا".

ووتیشی: "بەشداریكردنی شاندی بازرگانی هەرێمی كوردستان لەم جۆرە كۆڕبەندانەدا گرنگە، كە دەرەنجامی ساڵانی ڕابردووی كۆڕبەندەكە بە ئاشكرا لەسەر گەشەی ئابووری و پیشەسازی هەرێمی كوردستان دەبینرێت، لە ئێستاشدا بە دەیان و سەدان كۆمپانیای توركی لە ئاستە جیاوازەكاندا كاری وەبەرهێنان و سەرمایەگوزاری دەكەن، لە كۆڕبەندی ئەمجارەشدا هانی وەبەرهێنەران و خاوەنكارانی توركیا دەدەین بێنە هەرێمی كوردستان و پڕۆژەی وەبەرهێنان ئەنجام بدەن، بێگومان بە پێی ئەو پلانەی دانراوە و گفتوگۆی لەبارەوە كراوە لە داهاتوودا پەیوەندییەكانی توركیا و هەرێم دەچنە قۆناغێكی پێشكەتووترەوە".

كۆڕبەندی وەبەرهێنانی بازرگانی و كشتوكاڵی عێراق – توركیا، ساڵانە بە هاوبەشی ژوورە بازرگانییەكانی هەرێمی كوردستان لە ئیزمیر بەڕێوە دەچێت، كە تەوەری سەرەكی كۆڕبەندەكەش، گفتوگۆكردنە لەسەر برەودان و بەرەوپێشبردنی پەیوەندییە ئابوورییەكانی نێوان هەرێمی كوردستان و توركیا.