image


پەیامی کورد … ماوەی چوار ڕۆژە سێ كۆڵبەری کورد لەناو بەفردا بێسەروشوێنن

ماوەی چوار ڕۆژە سێ کۆڵبەری کورد لە سنوورەکانی نێوان ڕۆژهەڵاتی کوردستان و ‏تورکیا لەناو بەفردا بێسەروشوێنن، خەڵکی ناوچەکەش بەردەوامن لە گەڕان بەدوای ئەو ‏سێ کەسەدا.‏

ماوەی سێ ڕۆژی گەڕانی خەڵکی ورمێ بۆ دۆزینەوەی ئەو سێ کۆڵبەرە، هاوکات بووە ‏لەگەڵ بەفربارینێکی زۆر، کە تەنانەت ڕێگای گەیشتنی خەڵکی نەداوە بۆ بەرزاییەکان.‏

بەهۆی بەفربارینی زۆرەوە لە ناوچە سنوورییەکانی نێوان ورمێ-ی ڕۆژهەڵاتی ‏كوردستان و وان-ی باکوری کوردستان، ڕەنگە دۆزینەوەی ئەو سێ کۆڵبەرە ئەستەم بێت، ‏لە ئەگەری گیانلەدەستدانیشیان، دۆزینەوەی تەرمەکانیان تا بەهار قورس دەبێت.‏

لەگەڵ کۆڵبەرانی کورد لە سنوورەکە، پەنابەرە ئەفغانییەکانیش ڕێگای نێوان ورمێ بۆ ‏باکوری کوردستان دەگرنەبەر، کە ئەمان بەهۆی نەشارەزایی لە ڕێگاکان زووتر وندەبن، ‏لە تازەترین ڕووداویشدا ژن و پیاوێکی ئەفغانی لەو سنوورە گیانیان لەدەستداوە.‏