image



پەیامی کورد … هەڵمەتێكی دیكەی پێدانی ڤاكسین بە خوێندكاران لە هەولێر بەڕێوەچوو

بەمەبەستی دابینكردنی سەلامەتی بۆ خوێندكارانی كوردستان تایبەت بە پێدانی ڤاكسینی دژە كۆرنا لە هەرێمی كوردستان هەڵمەتێكی دیكەی پێدانی ڤاكسین بۆ خوێندكارانی 12 تاوەكو 18 ساڵ بەڕێوە چوو.

لەو بارەیەوە د. دلۆڤان محەمەد بەڕێوەبەری گشتی تەندروستی هەولێر رایگەیاند، لەو هەڵمەتەدا ماوەی دوو مانگ تیمەكان دەگەڕێن بۆ پێدانی ڤاكسین بە مامۆستایان و خوێندكارانی سنوری پارێزگای هەولێر، ئەوەش جگە لەو 50 بنكە و تیمانەی هەن بە پێدانی ڤاكسین بە هاوڵاتیان لە هەموو چین و توێژەكان.

 باسی لەوەش كرد، سەرەتای مانگی ئازاری ئەمساڵ تاوەكو ئێستا پرۆسەی پێدانی ڤاكسین بە هەموو چین و توێژەكان بەردەوامە و تاوەكو ئێستا هیچ حاڵەتێكی نەرێنی روینەداوە.

لەلایەن خۆشیەوە بەشدار عەبدولخالق بەڕێوەبەری گشتی پەروەردەی هەولێر ئاماژەی بۆ ئەوەكردووە، كردنەوەی سەنتەری پێدانی ڤاكسین بە مامۆستایانی هەولێر نیشانەی گرنگی پێدانی حكومەتە بە پرۆسەی پەروەردە و فێركردن بۆ ئەوەی بە پرۆسەیەكی سەلامەتدا تێپەڕن، هەڵمەتەكە مەبەست لێی سەلامەتی خوێندكاران و بەردەوامی پرۆسەكەیە، چونكە هەمووان لێی سوود مەند دەبن.