image

پەیامی کورد    ...  سەرۆکی پارتی دیموکراسی و پێشکەوتن خۆی بۆ پۆستی سەرۆککۆماری کاندید کرد

عەلی باباجان، سەرۆکی پارتی دیموکراسی و پێشکەوتن (دێڤا) رایگەیاند، ئەگەر پارتەکانی ئۆپۆزسیۆن کاندیدی هاوبەشیان بۆ پۆستی سەرۆککۆماری تورکیا نەبێت،  ئەو لەسەر ناوی پارتی دێڤا خۆی کاندید دەکات.

عەلی باباجان لە لێدوانێکدا ئاماژەی بەوەشکرد، هەر شەش پارتەکەی ئۆپۆزسیۆنی تورکیا لە کۆبوونەوەکانیاندا باسیان لە پرسی بوونی کاندیدی هاوبەش کردوە بۆ هەڵبژاردنی سەرۆککۆمار کە بڕیارە ساڵی ٢٠٢٣ بەڕێوەبچێت، بەڵام پارتەکەی ئەوان تائێستا لەبارەی ناوی کاندیدەکە و چۆنیەتی بەشدارییکردنیان لە پرۆسەکە دوا بڕیاری خۆی نەداوە.

ئاماژەی بەوەشکردوە، هەر شەش پارتەکەی ئۆپۆزسیۆن کۆدەنگن لەسەر گەڕاندنەوەی سیستەمی پەرلەمانی بۆ تورکیا، بۆ ئەو مەبەستەش پێویست دەکات چەند هەنگاوێکی دیکەی هاوبەش دەستپێبکەن، یەکێک لە هەنگاوەکانیش ئەوەیە دەبێت هەر شەش پارتەکە یەک کاندیدی هاوبەشیان هەبێت بۆ هەڵبژاردنی سەرۆکایەتی ساڵی ٢٠٢٣.

عەلی باباجان دەڵێت، ئەگەر پارتەکانی ئۆپۆزسیۆن لەسەر کاندیدێکی هاوبەش نەگەیشتن بە رێککەوتن، ئەوکات ئەو خۆی بۆ پۆستی سەرۆککۆماری تورکیا کاندید دەکات، لەگەڵ ئەوەشدا پارتەکانی ئۆپۆزسیۆن باسیان لە تایبەتمەندی ئەو کاندیدە کردوە کە دەبێتە کاندیدی هاوبەشی هەموو لایەنەکان. 
پێشتر پارتەکانی ئۆپۆزسیۆنی تورکیا کە پێکهاتون لە جەهەپە، ئیی پارتی، پارتی سەعادەت، پارتی دیموکرات، پارتی ئایندە و  پارتی دێڤا بەبێ بەشداری پارتی دیموکراتی گەلان (هەدەپە) کۆبونەوە، بڕیاریشە هەر شەش پارتەکە کۆتایی ئەم مانگە جارێکی دیکە کۆببنەوە.