image

پەیامی کورد       ...   مۆقتەدا سەدر ڕابەری ڕەوتی سەدر و میلیشیایەكی شیعە هەڕەشە دەكەن

لە ئەگەری نەكشانەوەی هێزەكانی ئەمریكا لە عێراق، گرووپی چەكداری ناوی خەڵكی تۆمار دەكەن بۆ ڕووبەڕووبوونەوەیان.

كازم فەڕتوسی ووتەبێژی میلیشیای سەیدولشوهەدا لە لێدوانێكی ڕۆژنامەوانیدا ڕایگەیاند، ناوی ٢٣ هەزار خۆبەخشیان تۆماركردووە، بۆ ئەوەی لەكاتی نەكشانەوەی هێزەكانی ئەمریكا، ڕووبەڕوویان ببنەوە.

ووتیشی”وادەی دیاریكراوی كشانەوەی هێزەكانی ئەمریكا نزیكبووەتەوە و چاودێری دۆخەكە دەكەن، بۆ ئەوەی بزانن واشینتۆن لەسەر كشانەوەی سەربازەكانی ڕاستگۆیە یان نا”.

ئاشكراشیكرد، ناونووسكردنی خۆبەخشان، پەیوەندی بە گرژییەكان لەگەڵ ڕەوتی سەدر لەبارەی ئەنجامەكانی هەڵبژاردنەكانەوە نییە.
جگە لە هێزەكانی ئەمریكا، گرژییەكانی عێراق دوای هەڵبژاردنەكان زیاتر بووە و مەترسی پێكدادانی سەربازی بوونی هەیە بەتایبەت لەنێوان ڕەوتە شیعییەكاندا، ئەمەش لەكاتێكدایە ڕێبەری ڕەوتی سەدر، هەندێك لایەن بە هەوڵدان بۆ گۆڕینی ئەنجامەكانی هەڵبژاردن تۆمەتبار دەكات و سەركۆنەی هەموو فشارە سیاسی و ئەمنییەكان دەكات.

موقتەدا سەدر ڕێبەری ڕەوتی سەدر لە تویتێكدا ئاماژە بۆ ئەوە دەكات، دەستێوەردانی لە كاروباری كۆمیسیۆنی باڵای سەربەخۆی هەڵبژاردنەكان ڕەتدەكەینەوە و سەركۆنەی هەموو ئەو فشارە سیاسی و ئەمنییانەشی كرد، كە دەخرێنە سەر كۆمیسیۆن.

هەروەها سەدر، داوای كردووە دەستێوەردان لە كاروباری دادوەری و دادگا، بۆ پەسەندكردنی ئەنجامەكانی هەڵبژاردن نەكرێت، لە كاتێكدا هەندێك لایەن دەیانەوێت خۆیان بگەیننە ئاستی گەورترین لیست، بۆ پەكخستنی حكوومەتی زۆرینە.