image

PeyamaKurd - Şêx Edhem Barzanî ku bi mebesta sefer û çareseriyê, li derveyî Kurdistanê ye, li ser peyama xwe ya li ser operasyon û dagirkeriya leşkerî ya Tirkiyê ya Kurdistanê û vegera xwe daxuyanî da.

Edhem Barzanî gotiye, ew di demeke kurt de dê vegere Kurdistanê û ti guhertin di boçûn û helwesta wî de çênebûye û ti caran ji helwesta xwe ya niştimanperwer jî paş de gav navêje.

Şêx Edhem Barzanî 29ê Gulana borî, Herêma Kurdistanê bicî hişt û piştî belavkirina peyamekê derbarê êrîşên Tirkiyê yên li ser xaka Başûrê Kurdistanê, hatibû îdîakirin ku Edhem Barzanî Kurdistan bi temamî bicî hiştiye û venagere.

Edhem Barzanî ew îdia red kirin û got, di ragihandina Kurdistan û derve de jî gelek tişt li ser sefera wî hatine gotin  ji ber helwesta wî ya li hember “dagirkirina xaka Kurdistana welatê me” û tekez kir, “Ez we piştrast dikim ku Kurdistan wargeha pîroz a min e û heta mirin jî min û welat ji hev dûr nagire.”

Edhem Barzanî di peyama xwe de dibêje, “Tişta min behs kir û helwest û boçûna min guhertin bi ser de nehatiye û dakokî li wê dikim ku li gor min pirsa parêzgariya li niştiman û helwesta li dijî dagirkeriyê, biryarên daîmî ne û ez dê her tim li ser wê helwestê bimînim û ti caran ji wê helwesta niştimanperwer paş de gav naavêjim.”

Edhem Barzanî li ser êrîşên Tirkiyê yên ser herêmên sînorî yên Başûrê Kurdistanê peyamek belav kiribû û destnîşan kiribû;  “Başûrê Kurdistanê ketiye ber dagirkeriya leşkerî û jenosîda jîngehê û dema wê hatiye em hemû bi hev re û bê dudilî zengila metirsiyê lê bidin.”