image

پەیامی کورد     ...    مەسروور بارزانی سەرۆکوەزیرانی هەرێمی کوردستان ڕاگەیندراوێکی گرینگ بڵاو دەکاتەوە " لە ووڵامی ٤٥ هەزار پرسیار " .

سەرۆكی حكوومەتی هەرێم رایدەگەیەنێت؛ چاكسازی وەك بابەتێكی سەرەكی كاری ئەم حكوومەتە بوە و هەنگاوی باش نراوە، بەڵام كاتی دەوێت بۆ جێبەجێكردنی، دەشڵێت: خەڵكانێك هەن بەرژەوەندییان هەیە لەوەی ئاستەنگ بۆ چاكسازی درووست بكەن.
مەسروور بارزانی سەرۆكی حكومەتی هەرێمی كوردستان كە ماوەیەك بەر لە ئێستا داوای لە هاوولاتیان كردبوو پرسیارەكانیانی ئاراستە بكەن، وەك خۆی باسی لێدەكات نزیكەی ٤٥ هەزار پرسیاری  لێكراوە و لە بەشی یەكەمی وولامەكانیدا سەبارەت بە پرسی چاكسازی رایگەیاند، كە چاكسازی كارێكی ئاسان نییە، وێڕای ئەوەی داواكاری زۆربەی خەڵكی كوردستانە، بەڵام خەڵكێكیش هەن لەوانەیە بەرژەوەندیان هەبێت و دەكرێت رێگری بكەن و ئاسانكاری نەكەن و هاوكار نەبن بۆ چاكسازی، بۆیە پێویستی بە پشوو درێژی هەیە و پێویستی بە ئیرادەیەكی بەهێز هەیە، هەروەها پێویستی بە هەندێك كاتیش هەیە بۆ ئەوەی بتوانین هەموو ئەو بەرنامەیەی لە كارنامەی حكوومەت پێشكەش كراوە، جێبەجێ بكرێت.
سەرۆكی حكوومەت راشیگەیاند: لەو ماوەیەدا زۆر شت كراوە، لەوانە نەهێشتنی گەندەڵی و نەهێشتنی دیاردەی بەرتیلدان، هەروەها زۆربەی ئەو خەرجیانەی پێویست نەبوون، لابراون و هەوڵدراوە داهاتی ناوخۆ بە رێژەیەكی بەرچاو زیاد بكرێت و تەنیا بە رێكخستنەوە داهاتەكان، توانرا داهاتی ناوخۆ دوو ئەوەندە زیاد بكرێت بەڵام بەهۆی قەیرانی كۆرۆنا و دابەزینی نرخی نەوت، وایكرد داهاتەكان كەمبێتەوە.

دەقی وەلامەكان

بەناوی خوای گەورە و میهرەبان

هاووڵاتیانی خۆشەویست

پێش ماوەیەك داوام لە ئێوەی بەڕێز كرد، لەسەر ئەو بابەتانەی بەلای ئێوەوە گرینگە، ئەگەر پرسیارتان هەیە، راستەوخۆ لە رێگەی سۆشیال میدیاوە پرسیارەكان ئاراستەی ئێمە بكەن و منیش بە پێی توانای خۆم ووڵام دەدەمەوە.

بە سووپاسەوە زیاتر لە ٤٥ هەزار پرسیار هاتووە، زۆر لەو پرسیارانە وەك یەكن، بگرە لەسەر یەك بابەت زۆر پرسیار كراوە. ئێمە بابەتەكانمان پۆلێن كردووە و كردوومانەتە چەند تەوەرێك. هەوڵدەم ووڵامی هەندێك لەو پرسیارانە ئەمڕۆ و دواتریش ووڵامی چەند پرسیارێكی تر بدەمەوە.

سووپاستان دەكەم بۆ متمانەتان و هیوادارم وەڵامی پرسیارەكانی خۆتان وەربگرنەوە.

یەكێك لە پرسیارەكان ئەمەیە، "چاكسازی كەی جێبەجێ دەكرێت و بۆچی تا ئێستا جێبەجێ نەكراوە؟".

خۆشەویستان، چاكسازی بابەتێكی گرنگە، ئاسان نییە. لەسەرەتای ئەم كابینەیە و لە بەرنامەی حكومەتیشدا، باسی ئەوەمان كرد، چاكسازی بەشێكی هەرە سەرەكی دەبێت لە بەرنامەی حكومەتی ئێمە.

لەسەرەتاوە دەستمان بە زۆر شت كرد. هەنگاوی باش نرا. دواتر پڕۆژە یاسای چاكسازی ئامادەكرا و رەوانە كرا بۆ پەرلەمان و رەزامەندی پەرلەمانی لەسەر وەرگیرا. ئێستا ئەو یاسایە ئامادەیە وەك كارنامەی حكومەت بخرێتە بواری جێبەجێكردنەوە.

بەڵام بیرتان نەچێت، چاكسازی كارێكی ئاسان نییە. راستە داواكاری زۆربەی خەڵكی كوردستانە. بەڵام خەڵكێكیش هەن لەوانەیە بەرژەوەندیان هەبێت، دەكرێت ئەوانە رێگری بكەن و ئاسانكاری نەكەن و هاوكار نەبن بۆ چاكسازی. لەبەر ئەوە ئەمە بابەتێكە پێویستی بە پشوو درێژی هەیە. پێویستی بە ئیرادەیەكی بەهێز هەیە. پێویستی بە هەندێك كاتیش هەیە بۆ ئەوەی بتوانین هەموو ئەو بەرنامەیەی لە كارنامەی حكومەت پێشكەشمان كردن جێبەجێ بكەین. ئەمە لەسەرەتای دەستپێكردنی كابینە، ئێمە چاكسازی وەك بابەتێكی سەرەكی كاری ئەم حكومەتە بووە و دەستمان پێكردووە و هەنگاوی باش نراوە، بەڵام هەندێكیش ماوە، كاتی دەوێت بۆ ئەوەی بەردەوام بین لە جێبەجێكردنی چاكسازی. كەواتە دەستمان پێكردووە، لەم ماوەیە زۆر شتمان كردووە، لەوانە نەهێشتنی گەندەڵی و نەهێشتنی دیاردەی بەرتیلدان، ئەمە بەشێكی سەرەكییە لە چاكسازی. لە خەرجی حكومەت كاری باشمان كردووە. زۆربەی ئەو خەرجیانەی پێویست نەبوون، لابراوون و هەوڵی ئەوەمان داوە داهاتی ناوخۆ بە رێژەیەكی بەرچاو زیاد بكەین. لەو ماوەیە جیا لەوەی سەرچاوەی دیكەی داهات درووست بكەین، تەنیا بە رێكخستنەوەی ئەو داهاتەی لە حكومەتی هەرێم بووە، داهاتی ناوخۆ دوو ئەوەندە زیادی كرد. بەڵام بەداخەوە لەو ماوەیە تووشی چەند قەیرانێك بووین، لەوانە بڵاوبوونەوەی كۆرۆنا لە هەرێم و لە دنیاش بووە هۆی پەكخستنی ئابووری تەنانەت زلهێزەكانیش و بێگومان كاریگەری زۆری لەسەر ئابووری هەرێم هەبووە، داهاتی نەوت و داهاتی ناوخۆ كەمبوویەوە. ئەمە وایكرد، تا حەددێكی زۆر كێشەمان بۆ درووست بكات. سەرەڕای ئەوەش ئێمە لە چاكسازی ئیداری و دارایی و لەو ریفۆرمانەی پێشكەشمان كردوون بەردەوام دەبین.

حەز دەكەم پشووتان درێژ بێت و دڵنیاتان دەكەمەوە، كە من لەگەڵ ئێوە دەمێنمەوە و هەرچەند كارێكی ئاسان نییە، بەڵام لەگەڵتان دەبم و بەردەوامیش دەبین لە جێبەجێكردنی چاكسازی لە هەموو ئاستەكاندا.

هەندێك پرسیاریش تایبەت بوون و لەسەر ژیانی تایبەتی خۆم پرسیار كراوون و بەڕێزێكی خۆشەویست دەڵێت: ئەگەر لە ژیانێكی ئاسایی و دوور لە سیاسەتت هەبوایە، حەزت دەكرد ببی بە چی؟

من حەزم لە شێوەكارییە. ئەگەر مەجالم هەبێت شێوەكاری دەكەم. حەزیشم لە سرووشتە و بێگومان لە بواری ژینگە پارێزیش وەك پیشە كارم دەكرد.

بەڕێزان هەندێك پرسیاری دیكەش هەن، یەكێك دەڵێت: سڵاو.. شاخەوانێكم و دڵسۆزم بۆ پاكڕاگرتنی ژینگە، ئایا ئامادەیت رۆژێك لەگەڵ ئێمە بەشدار بیت لە پاككردنەوەی شوێنێك بۆ پاراستن و جوانی سرووشتەكەمان؟

خۆم لەبەرنامەم دابوو، بەڵام لەبەر ئەم وەزعە نالەبارەی پەتای كۆرۆنا ئەوەمان دواخستووە، خۆم لەبەرنامەم دابوو، ئینشەڵڵا هەوڵدەدەم بتاندۆزینەوە و دوایی بەیەكەوە دەچین بۆ خاوێنكردنەوەی ژینگە.