image


پەیامی کورد ... لە ساڵێکدا چوار هەزار و ٣٠٠ تۆمەتبار لە هەولێر دەستبەسەر کراون

 

هێمن قادر پارێزگارى هەولێر بە وەکالەت ڕایگەیاند کە هۆکارى کێشەکانى ئەم دواییانەی شارەكە بە زۆری کۆمەڵایەتى بوون، دلێر نەجات بەڕێوەبەرى پۆلیسی هەولێریش رایگەیاند كە لە كۆی ١٠ هەزار ڕووداوی ساڵی رابردوودا لە هەولێر، نۆ هەزاریان ئاشکرا کراون، ٤٣٠٠ تۆمەتباریش لە هەولێر دەستگیر کراون.

 

ئێوارەى ئەمڕۆ لە کۆنگرەیەکى ڕۆژنامەنووسیدا هێمن قادر پارێزگارى هەولێر بەوەکالەت رایگەیاند ئێمە دڵنیایی دەدەینە هاوشارییەکانى خۆمان بە پشت بەستن بە تواناى پۆلیس و ئاسایش و هێزەکانى ناوخۆ کە ڕێگە نادەین کارى نایاسایی و ترساندن لەناو هەولێر ئەنجام بدرێن.

 

باسی لەوەش کرد کە ئەم دواییانە بەهۆی ئەو تیمانەى پۆلیس هەن توانراوە هەم ئۆتۆمبێل و ماتۆڕسیکلى سەرپێچیکار دەستیان بەسەردا بگیرێت هەم کەسانى لە یاسا دەرچوو دەستگیر کراون.

 

داواشى لە هاووڵاتییانى هەولێر کرد کە هاوکاری هێزەکانى پۆلیس و ئاسایش و هێزەکانى ناوخۆ بکەن بۆ ئاگادارکردنەوەیان لەهەر حاڵەتێکى نەخوازراو، ئەوە سەربارى هەموو دۆخێکى نائاسایی و تەندروستى و دارایی هێزەکانى ناوخۆ بەردەوام بوون لە خزمەتکردن.

 

لای خۆیەوە دلێر نەجاڕ بەڕێوەبەرى پۆلیسی پارێزگاى هەولێر ئاماژەى بۆ ئەوە کرد کە لە ماوەى ساڵی ٢٠٢٠دا لە شارى هەولێر، ١٠ هەزار و ٨٦١ تاوان هەبوون، هەروەها ٩٨٤٦ تاوان ئاشکرا کراون، دۆسیەکانیان یەکلایی بوونەتەوە کە دەکاتە %٩٢ دەکات، بەهۆی ئەو تاوانانەوە ٤ هەزار و ٣٠١ تۆمەتبار دەستگیر کراون و سەرجەمیان ڕووبەڕووى دادگا کراونەتەوە.

 

هەر لەو ساڵەدا ٦٥ تاوانى کوشتن لەناو شار ڕوویان داوە و ٦١ تۆمەتبار بەهۆیانەوە دەستگیر کراون، حاڵەتەکانى تەقەکردنیش لە ناو شارى هەولێر ٣٢ حاڵەت تۆمارکراون کە ٢٩ تۆمەتبار بەهۆیانەوە دەستگیر کراون، لە کۆی ١٣ تاوانى ڕێگری ٩ تاوان ئاشکرا کراون کە ١٧ تۆمەتبار بەشداریان کردووە و ١٥یان دەستگیر کراون، بە هەمانگى هێزەکانى ئاسایش و زێرەڤانیش ١٦/١٢/٢٠٢٠ تا ١٦/١ى ئەمساڵ ١٢ تۆمەتبار دەستگیرکراون کە ژمارەیەک چەک و کەرەستەیان دەستى بەسەردا گیراوە.

 

هەروەها هێزەکانى پۆلیسی هەولێر لە ساڵى ٢٠٢٠دا ١٨٨٥ سواڵکەریان دەستگیر کردووە لە هەردوو ڕەگەزى نێر و مێ، یەکێک لەو سواڵکەرانە لەماوەى ٧٢ کاتژمێردا ١٣ ملیۆن دینارى کۆکردبووەوە، هەروەها دەستگرتن بەسەر ٤٥ تۆن خۆراکى بەسەرچوو، ١١٢ شوێنى زێدەڕۆیی لادراون و ٢٠٨ ئۆتۆمبێلیش دەستى بەسەردا گیراوە. ٢٦٥ سەرپێچیکارى دەرچوو لە ڕێنماییەکانى پارێزگا دەستگیربکەن.

 

هەر لەو ساڵەدا ٥ جار هەڵکوتان بۆ سەر نەخۆشخانە و ٢ جاریش هەڵکوتراوەتە سەر دەرمانخانە و ٤ جاریش هەڵکوتراوەتە سەر کافتریاکان و بەوهۆیەوە سەرجەم تۆمەتباران دەستگیرکراون.

 

باسی لەوەش کرد کە ١٨٣ تۆمەتبار کە لەلایەن شارەکانى کوردستان و عیراقەوە داواکرابوون، دەستگیرکراون و ڕەوانەکراونەتەوە.