image

به‌پێى هه‌واڵى میدیا عێراقییه‌كان، رۆژى سێشه‌مه‌ 6ى نۆڤەمبەری 2018، عادل عه‌بدولمه‌هدى سه‌رۆك وه‌زیرانى عێراق له‌ لێدوانێكى رۆژنامه‌وانیدا سه‌باره‌ت به‌ مادده‌ى 140 و به‌شه‌ بوودجه‌ى هه‌رێمى كوردستان ڕایگه‌یاند: گه‌یشتن به‌ چاره‌سه‌رێكى گونجاو بۆ مادده‌ى 140ى ده‌ستوورى عێراق و به‌شه‌ بوودجه‌ى هه‌رێمى كوردستان به‌ شێوه‌یه‌كى عادیلانه‌ پێویسته‌.

عادل عه‌بدولمه‌هدى له‌ وه‌ڵامى پرسیارێكدا كه‌ باس له‌ مادده‌ى 140 و به‌شه‌ بوودجه‌ى هه‌رێمى كوردستان وتى: گه‌یشتن به‌ چاره‌سه‌رێكى به‌ ئینساف و گونجاو بۆ هه‌موو لایه‌نه‌كان گرینگه‌ و بۆ ئه‌و مه‌به‌سته‌ش لێژنه‌یه‌ك درووست ده‌كه‌ین، هه‌روه‌ها ئه‌نجوومه‌نى وه‌زیران و ئه‌نجوومه‌نى نوینه‌ران لایه‌نى په‌یوه‌ندیدار ئه‌و پرسه‌ تاوتوێ ده‌كه‌ن و لێژنه‌كه‌ش بۆ پرسى به‌شه‌ بوودجه‌ى هه‌رێمى كوردستان له‌گه‌ڵ ئه‌نجوومه‌نى نوینه‌ران له‌سه‌ر ئه‌و پرسه‌ گفتوگۆ ده‌كات. 

عه‌بدولمه‌هدى ئاماژه‌ى به‌وه‌شدا كه‌ گه‌یشتن به‌ چاره‌سه‌رێكى گونجاو دڵى هه‌موو پێكهاته‌كانى عێراق ڕازى بكات و نه‌گه‌یشتن به‌ چاره‌سه‌رێك بۆ مادده‌ى 140 ده‌بێته‌ هۆی درووست بوونى كێشه‌ و پێكدادان، ئه‌مه‌ش بۆ هیچ لایه‌ن و پێكهاته‌كانى عێراق باش نییه‌ و ده‌بێت كارێك بكرێت كه‌س مافى پێشێڵ نه‌كرێت كه‌سیش وا هه‌ست نه‌كات غه‌درى لێكراوه‌ هه‌موو هاووڵاتیانى عێراق دەبێ بگه‌نه‌ مافى ڕه‌واى خۆیان به‌شێوه‌یه‌كى یه‌كسان.