image

پەیامی کورد    ...     بە پێی ئەم فەرمانە ئەم کەسانە زەوی وەردەگرن

سێ ساڵ پێش ئێستا، لە رێگەی فۆڕمێ كەوە ناوی كرێنشینان و ئەوانەی سوودمەند نەبوونە لە وەرگرتنی زەوی، تۆمار كراوە و وەزیری شارەوانییش دەڵێ، دابەشكردنی زەوی پەیوەستە بە سیاسەتی گشتی حكوومەتی ھەرێمی كوردستانەوە و ھەر كاتێك بڕیار بدرێت بۆ دابەشكردنی زەوی، شارەوانی جێبەجێی دەكات.

ساسان عەونی، وەزیری شارەوانی و گەشتوگوزار، رایگەیاند: "ھەر كەسێك لە ھاووڵاتی و فەرمانبەر پێشتر فەرمانی وەرگرتنی زەوی ھەبێت، بێگومان مافی نافەوتێت و زەوی پێ دەدرێت، بە تایبەتی ھەر خانەوادەیەكی سەربەرزی شەھیدان فەرمانی ھەبووبێت، زەوی پێ دراوە".

وەزیری شارەوانی جەختی كردەوە: "تەنیا لە حاڵەتێك نەبێت لە ھەندێ شار و شارۆچكە زەوی ئیفرازكراو نەبێت دواكەوتبێت پێدانی زەوی، بەڵام لە سەنتەری شارە گەورەكان ھەموو خێزانێكی شەھید سوودمەند بووە لە وەرگرتنی زەوی بەپێی بڕیاری سەرۆكایەتی ئەنجوومەنی وەزیران".

لەبارەی دابەشكردنی زەوی بۆ كرێنشینان و فەرمانبەران، ساسان عەونی گوتی: "دابەشكردنی زەوی لە دەسەڵاتی ئێمەدا نییە وەك شارەوانی، بەڵكو پەیوەستە بە سیاسەتی گشتی حكوومەتی ھەرێمی كوردستان، ھەر كاتێك بڕیار بدرێت لەلایەن حكوومەتەوە، وەزارەتی شارەوانی ئامادەیە بۆ جێبەجێكردن".