Tîma Atletico Madrid a Îspanî tê Kurdistanê

PeyamaKurd – Hat ragihandin ku Tîma Futbolê ya navdar a Îspanî Atletico Madrîd, li Herêma Kurdistanê hejmarek projeyên girîng ên di warê tenduristî, werzişî û perwerdeya futbolê de, bicih dike.

Serokê Desteya Veberhênanê yê Herêma Kurdistanê Dr. Mihemed Şukrî, îro 18ê Gulanê bi nûnerê Hikûmeta Herêma Kurdistanê yê bi wekalet li Îspanyayê Aydin Ostan re civiya.

Hat ragihandin ku di hevdîtinê de behsa karê hevbeş û hemahengiya di navbera Desteya Veberhênan û nûnertiya Hikûmeta Herêma Kurdistanê ya li welatê Îspanyayê hate kirin ku, veberhêner bên teşfîq kirin û kompanyayên wî welatî bi armanca veberhênanê bînin Herêma Kurdistanê.

Hat diyarkirin ku biryare di dema pêş de bi rêya nûnertiya Hikûmeta Herêma Kurdisstanê ya li welatê Îspanyayê hejmarek veberhêner ên di sektorên tenduristî û werzişî de li Herêma Kurdistanê, karê veberhênanê bikin.

Herwiha di vê çarçoveyê de, tîma Atletico Madrid jî bi vekirina çend dibistan û navenda werzişî ya bi armanca rahênan û perwerdeyê tê Herêma Kurdistanê.