Serokê Herêma Kurdistanê Nêçîrvan Barzanî ji Tehranê dageriya Kurdistanê
PeyamaKurd – Li ser dawetkirina rêvebiriya Îranê, serokê Herêma Kurdistanê Nêçîrvan Barzanî bi seredana fermî çûbû Tehranê û piştî têkiliyên dîplomatîk yên navbera Herêma Kurdistanê û Îranê bi dawî bûn, dageriya Herêma Kurdistanê, payîtext Erbîlê.
Li gor ragihandina serokatiya Herêma Kurdistanê, Nêçîrvan Barzanî û heyeta pê re, piştî seredana bi 2 rojan ji bo Tehranê, vê êvarê dageriyan Herêma Kurdistanê.
Serokê Herêma Kurdistanê Nêçîrvan Barzanî û heyeta pê re li Tehranê bi serokê dînî yê Îranê bi Ayetullah Ali Hamaney, bi serokkomar Îbrahîm Reîsî, bi wezîrê karên derve yê Îranê Huseyin Emir Abdullahiyan, bi serokê meclisa Îranê bi Muhammed Bagır Galibaf, bi sekreterê giştî yê konseya ewlehiya Îranê Ali Ekber Ahmediyan û bi fermandarê giştî yê artêşa Îranê Huseyin Selami re hevdîtinan kirin.
Di hevdîtinan de li ser têkiliyên Iraqê, Kurdistan û Îranê û hevkariya her sê welatan axifîn. Barzanî di hevdîtinên xwe de ragihand ku ew weke Herêma Kurdistanê dixwazin têkiliyên xwe bi Îranê re pêş bixin.
Nêçîrvan Barzanî îro li Tehranê di civîna çapemeniyê de behsa naveroka hevdîtinan kir û got ku têkiliyên Herêma Kurdistanê bi Îranê re ketiye asteka dinê ya nûh.
Bi serokê Herêma Kurdistanê Nêçîrvan Barzanî re di heyeta Kurdistanê de, cîgirên serokê herêma Kurdistanê Cafer Şêx Mustafa û Mustafa Seyîd Qadir, wezîrê karên navxwe Rêber Ahmed û berdevkê serokatiya Herêma Kurdistanê Dilşad Şahab hebûn.
