image

PeyamaKurd - Helbestvana navdar a Başûrê Kurdistanê Kejal îbrahîm Xidir ku di 24ê Nîsana 2018an de ji ber nexweşiyekê di 50 saliya xwe de li Silêmaniyê koça dawî kir, wesiyetek ji hevjînê re kiriye û daxwaz kiriye ku berhemên wê yên neçapkirî bide ber çapê û belav bike.

Hevjînê Kejal Îbrahîm Xidir, Mamoste Rêbwar ji Rûdawê re ragihand: "Beriya ku wefat bike, min jê re got 'ez dixwazim beriya te bimirim, lewra piştî te ez nikarim rûbirûyî nedadiyên civakê bibim', herwiha daxwaz kir, ez soz bidim ku ez ê berhemên wê yên neçapkirî çap û belav bikim. Min jî soz da ku umrê min têr bike ez ê bikim.”

Li ser berhemên neçapkirî yên Kejal Îbrahîm Xidir, Rêbwar diyar kir: “Çar dîwanên wê yên neçapkirî hene ku hemû helbestên kurt in, herwiha heşt dîwanên wê yên ku ji aliyê çend nivîskarên Kurd ve bo zimanê Erebî hatine wergerandin nehatine çapkirin û nêzîkî 850 rûpel in.”

Mamoste Rêbwar ku weke rêveberê karên wê, piştgirî daye Kejal Îbrahîm, dibêje: “135 babetên nivîskar û lêkolerên diyar ên Ereb li ber destê min e ku li ser helbest û berhemên Kejal nivîsandine, ez ê wiya jî bikim pirtûk û çap bikim.”

Helbesta herî dawî ya Kejal Îbrahîm, heman roja wê ya koça dawî di rojnameyekê de hat belavkirin, navê wê jî "Jiyaneke tijî bêdengî" ye.

Kejal Îbrahîm Xidir kî ye?

Kejal Îbrahîm Xidir di sala 1968an de li bajarokê Qeladizê yê ser bi Silêmaniya Başûrê Kurdistanê ji dayîk bûye. Perwerdeya seretayî û navendî û piştnavendî temam kiriye û diya sê zarokan e.

Di sala 1987an de dest bi nivîsandinê kiriye û di destpêkê de bi helbestên zarokan dest pê kiriye, piraniya helbestên wê di kovar, rojname û malperên elektronîk de hatine belavkirin, herwiha xwedî 28 dîwan û pirtûkên helbestan e.

Helbestên Kejal Îbrahîm Xidir bo Fransî, Erebî, Farisî, Îngilîzî, Rûsî û Îspanî hatine wergerandin û du berhemên wê bo şanogerî hatine kirin. Herwiha dîwaneke wê jî bo zimanê Emazîxî hatiye wergerandin.